Du mindsht nuch ferleicht fun sellem oldta gowl woo dote gonga is em sexta November, 1888. Ich hob g'sawd de official luder-grobba data ene farrisa eb are recht dote ware. Won du by mere in Washingdon g'west wærsht dorrich de 'noggeration don kensht du en idea forma we feel luder-grobba dos es in denna United States hut. Washingdon hut g'schwarmed mit office seekers we de micka uff ma dota asel. De Polly wore mit nunner. Es wore es arsht mohl dos se ous America wore un es hut se woonerbawr gableesed. Wile ich en kondadawt bin far de Hawsa Barrick pusht-office bin ich grawd ins Wise House ni. Der Harrison wore om karabet nunner nawgala in anes fun da shtoopa un ich bin uff galuffa tsu eme, my hond nows g'shtrecked un hob g'sawd, "We gates, Bench?" "Ware bisht du?" hut are g'sawt. Des hut mich base gamaucht, un ich hob g'sawt, "Coom mer mit so norrheita. Ich hob duch far dich g'shtimmed, now kent mich nemond mæ noach dem dos eer ketzer my shtim het." Derno hov ich mich uff g'shtrecked tsu minera fulla leng un hob g'sawd, "Ich bin der Boonastiel fum Hawsa Barrick!" Der shtrain hut mere en gallus-knup ob garrissa un ich hob hinere galongt far ene greega. Der Harrison hut gamaned ich date far en pishtole longa un en mon mit bloa glaider un gaila knep hut mich nows g'feared. Won der Billy Bixler by mere g'west ware don het's en fuss gevva, awver ich un de Polly wora læ un se kon net feel do except mit eram mowl. Ich glawb ferleicht duch net os es der Bench selver wore. Won ich shure ware don date ich eme si gons kocha won are widder rous commed far Bresident.
Owets sin mere derno on der 'Noggeration Ball, un so socha hov ich in meim læva net g'sæna. Ich hob shunt shtouta weipsleit g'sæna awver nee net so weit nunner. Ei, es wore miner sale on shont mit era low-neck gowns. De hoongericha bublin hen ivveroll room awfonga heila. Ich hob anera g'sawd von se ken hem het don date de Polly era's ous un era's gevva, wile de Polly anyhow net donsa wet, derno is era mon cooma un hut mich dexla wella. "Yaw," hov ich g'sawt, "shlock du mull der Boonastiel, derno brech ich dich fun-nonner un sae wos in dere is." Are hut net. Ich wore usht in trim far de gons ferdihenkert administration garava. De moosic wore g'furnished by em Simmy Roush sime flying-horse orchestra. Der Quay un der John Wanamaker hen gagiked, un der Dan Hastings hut de boss drum gablosa. Unser Jury Commissioner hut ob-garoofa, un es hut mere ols recht hame-wæ g'maucht ene ivver oll de yocht hara greisha, "Salute your p-pa-pa-ardner," "b-b-b-alance all," "swing your p-pard-pardner." "Damet, look out o-o-over there and d-d-don't mix up so." De monsleit hen negel-rupper reck aw g'hot, grawd we miner, usht se wora net so "antique." My gross-fodder hut miner g'wora om General Jackson sinera 'noggeration. Se hen cider gadrunka dos finf dawler de buddla wore. Se hen's shampaginy wasser g'haesa. Der "sham" wore im mawga, un der "pain" is comma won mer uff g'sobered is.
Ich hob de 'noggeration bully enjoyed. Washingdon is en grosse shtodt, awver far ruich laeve un sailich shtarva geb mere un der Polly nuch unser oldte schwarda shandy om Hawsa Barrick.